PGµç×Ó

Executive summarie

We ar leukan the ratifeein o the 2003 Convention for tae stairt a collogue throu aa the UK anent our cultural heirship - the fowkgaets, performance, prattiks a crafts as haes a importan roel for the identitie, pried, an cohesion o commonties athort the UK – an the wey we aa saufguards this no tangibil cultural heirship, at we will refer tae wi ‘leivean heirship’.

This consultation his maed up a pairt o the beginnin o the collogue anent leivean heirship in the UK an we ar efter wirkan naurhaund wi the Devolved Govrenments for tae gree tae this repoen.

Leivean heirship is a braid airt at haps a wheen differan policie airts sae as the will aften no be a ae-size-ansuers-aa repoen, but we will cam tae the inventors an braider implement o the Convention wi the principils o bean commontie-foundit, inclusive, respectfu an appen.

Our oweraa approach his been tae gie focus tae the practicalities o settan furth the inventors an we hae greed tae a wheen heid pynts anent the ettil:

• The inventors will gie uphauld tae the identifeein an ken o the leivean heirship in the UK throu a ‘stok-takkan’ process, an help wi uphauldan awaurness an gie a heft tae futur saufguardan collogues.

• The criteria for inpit disna comprehend a vailyie juidgement, pruiwin or categorisein o signeificance, import, or onie lyk metric.

• The benefits o inpit in the inventors will lyk chynge for ilka eitem an commontie, but coud comprehend mair awaurness an ken forby inlets for mair engagement an wirkin thegither.

• The inventors is for bean eiterative an the will be raiglar appen caas for commonties tae pit in thair leivean heirship. Thay arna a tuil for mappin, a register or a record o the leivean heirship in the UK, an arna ettilt at bean a encyclopaedia or archive.

• A eitem a-pittan in tae the inventors disna automatic mean the ar onie responsibeilitie or obleigement frae onie organisation, boadie or govrenment for tae gie direct uphauld tae that eitem.

• The inventors is a haemlie process at bes sindert frae the lists helt at the UNESCO.

We will gae on wi referan tae the Convention text for the greed defineition o no tangibil cultural heirship or leivean heirship, an kennan at the defineition bes (aiblans deleiberat) appen tae interpretation. But we winna be makkan uiss o sic terms lyk ‘tradeitional’, ‘contemporar’, ‘authentic’ or ‘heirship’ an giean defineition tae whit bes or besna leivean heirship or whit sud be a-pittan in the inventors.

We will gae alang wi the poseition taen on frae the Convention an no tak in submeisions alane for organised releigions an haill seistems o belief, but gie a walcum tae submeisions o cultural prattiks relaet tae the releigion. We will gie a walcum tae submeisions as maks uiss o langage lyk a vehicle, an will gie uphauld tae a wheen haemlie, indigenous leids wi translation (forby wirkan bilingual in Welsh, as bes stateutor nott), but we winna pit in leids thair lane in the inventor.

Criteria

The war strang uphauld in the repoens tae the survey anent the propoent criteria, wi mair nor three quairters o the repoenars for thaim. An takkan tent tae commends an suggestions, we hiv helt the criteria propoent, brocht twa thegither for practicalities an put on three mair forby for tae gie mair claritie

• Maun be practeised thenou. Tae be conseidert for the inventors the eitem maun hae a leivean commontie at haulds the ken or knawledge o the eitem tae be cairriet out, an as bes aibil for giean the eitem ower tae generations tae cum. Submeisions sud gie out wittins anent the viabeilitie o the eitem thenou an in the futur; an will be aibil for mintan, wad the commontie pittan in the eitem be thinkan on it bean in danger, e.g. at hit bes in danger o deean out wi nae mukkil chynge in the level o transmeision thenou.

• Can hae oreigins frae oniewhaur an be frae onie tym, but maun comprehend wittins anent the historie an transmeision athin the commontie hit bes a-dae wi. The eitem haes nae meinimum age nor owergiein a meinimum nummer tyms nott, an hit can hae oreigins frae oniewhaur an oniebodie.

• Maun be the leivean prattik itssel. A submeision tae the inventors sud hae in it wittins anent the associaet elements o the eitem whaur haean relevance, but the eitem o leivean heirship maunna be the associaet tuils, instruments, costeums, materials etc. alane, nor be the outcum, outpit, creaution or result alane.

• Maun gae wi international greed human richts staundarts thenou. For ensaumpil, wi the richts o ithers tae no-discreimination an equal treatment, preivacie, freedom o thocht an outlet, an pairttakkin in social an cultural lief.

• Maun hae free, foer an informt consent frae the commontie. The submeision maun gie evident at the practeisean commontie his greed tae the eitem o leivean heirship a-pittan intae the inventors.

• Onie commercial benefit frae the leivean heirship eitem, maun be for the primar benefit o the commontie.

Code o ethics

We heart tae a reinge commends an suggestions relaet tae ither criteria anaa, but the war a want o consensus or objective founds for tae pruiw a eitem agin the criteria, sae insteid we hae brocht foer a code o ethics.

The code o ethics is for inpittan commonties tae think on, an coud help wi giean wittins tae futur collogues anent the saufguardin, but winna mak a pairt o the criteria for inpit in the inventors.

• Sud respect the ainimals, naitur, an environs.

• Sud respect national legal fraemwarks thenou, an forder positive halth, weel-bein, an sauftie for thair ain sels an ithers.

• Sud big peace, respect, social cohesion an incluseivitie, an evyt discreimination athin thair ain leivean heirship prattik(s), braider commonties, an an wirkan thegither wi ither leivean heirship practeitionars.

Categories

The heid commeunins in this subject comprehendit the findin o a balance atween uphauldan the UNESCO categories for aise o the wirkin thegither, an the makkin o the categories an wirdin sae uissfu an aiccessibil as aibil for the UK context.

We will uphauld the fyv UNESCO categories an eik tae thaim twa mair anent ‘Sports an Gaems’ an ‘Culinar Prattiks.’ We will chynge the naems an simplifee the wirdin for the categories, forby pittan on expleicit reference tae Laund an Beliefs.

• Oral Expressions Leivean heirship relaet tae baith spakken-wird an no-verbal communicatein as bes maed uiss o for tae gie ower ken, cultural an social vailyies an collective memorie. Ensaumpils coud comprehend proverbs, riddils, sangs, nurserie rhymes, or the storietellin.

• Performan Airts Leivean heirship relaet tae the performance an human creauteivitie. Ensaumpils coud comprehend differan muisic prattiks, dance, or drama.

• Social Prattiks Leivean heirship at bes aften shaert an practeised frae a curn. Ensaumpils coud comprehend calendar or seasonal customs, haundlins, celebrations or rituals.

• Naitur, Laund, an Spiritualitie Leivean heirship relaet tae the environs an belief. Ensaumpils coud comprehend techniques for the biggin, seistems o laund management, ken anent certaint ainimals an plaunts an ecologies.

• Crafts Leivean heirship relaet tae the skeils, ken an makkin o things, aither wi haund or wi asseistit tuils. Ensaumpils coud comprehend speceific prattiks o the wabbin, wuid kervein, potterie, blaksmithin, or staenmasonrie.

• Sports an Gaems Leivean heirship relaet tae the gaems, kemps or acteivities wi pheisical maucht an/or skeil nott. Ensaumpils coud comprehend the sportin events or recreational gaems.

• Culinar Prattiks Leivean heirship relaet tae the prepaerin an consumpt o meat an drink. Ensaumpils coud comprehend the makkin o speceific dishes or the social shaerin o meat an drink.

Neist steps

We will pit furth faurder wittins an guidance anent the wey o haean inpit tae the inventors, an appenan the caa for submeisions laeter theyear.